ராணிப்பேட்டை அடுத்த அம்மூரை சேர்ந்த சரவணன் (40) என்பவர், கடந்த 7ம் தேதி இரவு சித்தூரிலிருந்து அம்மூர் நோக்கி காரில் வந்து கொண்டிருந்தார். அம்மூர் காட்டுப்பகுதியில் இவர்களுக்கு பின்னால் காரில் வந்தவர்கள் முந்திச்சென்று வழிமடக்கி காரை நிறுத்தினர். பிறகு சரவணனின் கார் கண்ணாடியை உடைத்து கத்தியை காட்டி மிரட்டி ரூ.15 லட்சம் ரொக்கப்பணத்தை பறித்துச்சென்றனர்.
இந்த வழிப்பறி கொள்ளை குறித்து ராணிப்பேட்டை மாவட்ட எஸ்பி கிரண்ஸ்ருதி விசாரணை நடத்தினார். ஏஎஸ்பி விஸ்வேஸ்வரய்யா தலைமையில் டிஎஸ்பி பிரபு, இன்ஸ்பெக்டர் பார்த்தசாரதி, சப் இன்ஸ்பெக்டர்கள் பாஸ்கரன், சஞ்சீவிராயன் மற்றும் போலீசார் கொண்ட தனிப்படை அமைத்து குற்றவாளிகளை கண்டுபிடிக்க உத்தரவிட்டார்.
தனிப்படை போலீசார் நேற்று காலை பெங்களூரை சேர்ந்த எல்லப்பா (28), சென்னவீரப்பா (22) ஆகிய 2 பேரை அதிரடியாக கைது செய்தனர். அவர்களிடமிருந்து ரூ.9.4 லட்சம் பணம் கைப்பற்றப்பட்டது. மேலும் இருவரை தேடி வருகின்றனர்.
கைது செய்யப்பட்டவர்களை ராணிப்பேட்டை நீதிமன்றத்தில் ஆஜர்படுத்தியதில், அவர்களை 15 நாட்கள் நீதிமன்ற காவலில் வைக்க உத்தரவிடப்பட்டது.
இந்த வழிப்பறி கொள்ளை சம்பவம் குறித்து ராணிப்பேட்டை மாவட்ட எஸ்பி கிரண்ஸ்ருதி செய்தியாளர்களிடம் கூறியதாவது:
"சரவணன் என்பவரிடமிருந்து ரூ.15 லட்சம் ரொக்கப்பணத்தை பறித்துச்சென்ற கொள்ளையர்களை விரைந்து கண்டுபிடிக்க தனிப்படை அமைத்தோம். தனிப்படை போலீசார் நேற்று காலை பெங்களூரை சேர்ந்த எல்லப்பா, சென்னவீரப்பா ஆகிய 2 பேரை அதிரடியாக கைது செய்தனர். அவர்களிடமிருந்து ரூ.9.4 லட்சம் பணம் கைப்பற்றப்பட்டது. மேலும் இருவரை தேடி வருகிறோம்.
கைது செய்யப்பட்டவர்களை ராணிப்பேட்டை நீதிமன்றத்தில் ஆஜர்படுத்தியதில், அவர்களை 15 நாட்கள் நீதிமன்ற காவலில் வைக்க உத்தரவிடப்பட்டது. இந்த வழக்கு தொடர்பாக மேலும் விசாரணை நடந்து வருகிறது" என்றார்.
